Бүгүн борбор калаадагы Токтогул Сатылганов атындагы Кыргыз улуттук филармониясында IV Элдик курултайдын экинчи күнү өз ишин баштады.

Курултайга президент Садыр Жапаров, Жогорку Кеңештин депутаттары, министрлер кабинетинин мүчөлөрү, мамлекеттик органдардын жана президенттин облустардагы өкүлдөрү катышууда.

Ошондой эле 231 айыл аймактан жана 33 шаардан шайланган жалпы 700 делегаттын 690ну катышууда. Анын ичинен 146сы аялдар, 554ү эркектер.

Делегаттар шайланып келген аймагынын көйгөйлөрүн, сунуш-пикирлерин бийликке жеткирүүдө. Ал эми мамлекеттик органдар аларды чечүү аракетин көрүшмөкчү.

Делегаттар тарабынан Эсептөө комиссиясынын 11 мүчөсүн жана Улуттук кеңештин 17 мүчөсү бекитилген. Андан соң Улуттук кеңештин 17 мүчөсү төраганы жана анын эки орун басарын шайлашты.

Эскерте кетсек, IV Элдик курултайдын Улуттук кеңешинин төрагасы болуп Мамбеткерим Чекиров, төраганын орун басарлары болуп Замирбек Көчөрбаев жана Байболот Абытов шайланышкан. Ал эми IV Элдик курултайдын эсептөө комиссиясынын төрагасы болуп Жаныбек Баргыбаев шайланган.