Кыргызстанда токой жана бак-дарактарга мониторинг жүргүзүү үчүн электрондук портал түзүлдү, учурда ал сыноо режиминде иштеп жатат. Бул тууралуу 11-мартта Жогорку Кеңештин агрардык саясат, суу ресурстары, экология жана регионалдык өнүктүрүү боюнча комитетинин жыйынында жаратылыш ресурстары министринин орун басары Алмаз Мусаев билдирди.
Портал төмөнкүлөргө мүмкүндүк берет:
— ар бир отургузулган жердин GPS-координаттарын аныктоого;
— токой массивдерин, жемиш бактарын жана жол боюндагы тилкелерди бөлүүгө;
— аймактар боюнча пландардын аткарылышын онлайн режимде байкоого.
Мусаевдин айтымында, жашылдандыруу боюнча иштердин натыйжалуулугун жана ачык-айкындуулугун жогорулатуу максатында электрондук система Өзгөчө кырдаалдар министрлиги менен биргеликте киргизилүүдө. Берилген тапшырмаларды аткаруу мөөнөтү — 2026-жылдын 31-мартына чейин.
«Эми биз кайсы жерге кандай дарактар отургузулганын көзөмөлдөп, отургузуулардын натыйжалуулугун талдап чыга алабыз», — деп кошумчалады ал.
