Кадамжайда жаңы төрөлгөн ымыркайдын жансыз денеси табылды. Бул тууралуу 7-каналга Баткен ОИИБден билдиришти.
Маалыматка караганда, 16-март күнү саат 18:00 чамасында Кадамжай шаарынын 42 жаштагы тургуну малын багып жүрүп, Кадамжай районунун Миң-Жылга сайынан бир баштык таап, ичин караганда, ымыркайдын жансыз денеси табылган. Ал милицияга кабар берген.
Кадамжай РИИБдин жетекчиси ыкчам-тергөө тобу менен аталган жерге барып, баштыкта жаткан жансыз ымыркай ак материалга оролгондугу аныкталган. Ошондой эле ымыркай менен кошо сумканын ичинен MI Bend 4 кол сааты табылган. Бул фактыны Кадамжай РИИБдин маалыматтардын электрондук журналына каттап, жансыз денеге экспертиза дайындалды. Азыркы күндө ымыркайдын энесин жана аны талаага таштаган белгисиз адамдар боюнча иликтөө иштери жүрүп жатат.
