Кечээ 29-мартта Бишкек-Ош унаа жолунда унаа оодарылып кетип, Куралдуу күчтөрдүн катарында кызмат өтөп жаткан аскер каза болду. Бул тууралуу Борбордук штабдын басма сөз кызматынан билдиришти.
Маалыматка ылайык, кырсыктын кесепетинен Нурзат Ажыгожоева аттуу аскер кызматкери каза болгон. Маркумдун артында 3 баласы калды.

Ал эми аталган кырсыктан ырчы Нурчолпон дагы жабыркагандыгын ал инстаграм баракчасы аркылуу билдирди. Нурчолпон кырсыкка кабылгандан кийин жабыркагандарды Кара-Балта шаарындагы оорукананын коридорунда жатканын айтты.
«Бизди Кара-Балтанын ооруканасына алып келип коюшту, коридордо жатабыз. Госпиталга алып кетише элек, бизге өз убагында тез жардам көрсөтө албагандыгы өкүнүчтүү болуп жатат», — деген ал социалдык тармактагы билдирүүсүндө. Кийинчерээк ырчы дагы билдирүүлөрдү жарыялап, анда «Тез жардам» кызматындагылар жолдон токтоп, тамактанып алалы дешкенин, жабыркагандар жеке унаалары менен ооруканага барайын десе, унаадан чыгарбай жатканын кошумчалаган.  Алдын ала айтылган маалыматтарга караганда, айдоочу унаанын рулун башкара албай калган.

Бул арада ӨКМнын басма сөз кызматынан окуянын чоо-жайын айтышты.
«Такталган маалымат боюнча, саат 12:30 чамасында Бишкек-Ош унаа жолунун 159-чакырымында КамАЗ-Вахтовка үлгүсүндөгү унаанын айдоочусу рулду башкара албай, унаа жолдон чыгып оодарылып кеткен. Жол кырсыктын кесепетинен А.Н. аттуу аял каза болуп, 5 адам ар кандай жаракаттарды алышкан. Учурда алардын аты-жөндөрү такталууда», — деп жазылат маалыматта.