Кочкордо асынып каза болгон мугалимдин жакындары анын өлүмүнө мектеп жетекчилигин күнөөлөп жатышат. Бул тууралуу «Турмуш» жазып чыкты.

• 11-мартта Кочкордо 54 жаштагы аялдын жансыз денеси асынган абалда кампадан табылган. Кийинчерээк анын мугалим экендиги маалым болгон.

Маркумдун жолдошу Калмурат Кашкелеңов жубайынын акыркы күндөрүн айтып берген. Анын айтымында, мугалимди прокуратурага 4-мартта чакырышкан. Ал жакка экөө чогуу барган. Чыгып эле диплом текшерип жатышканын айткан. 9-март күнү аны майрамы менен куттуктоо үчүн үйүнө мектептеги агайлар барышкан. Маркумдун күйөөсү алардын «Эмнеге минттиңиз? Бизди эмнеге басынтышат?» деп сүйлөшкөнүн угуп калган. Эмнеге минтип айтып жатышканын сураганда, мугалим мектептен кетүүгө арыз жазганын айткан. Алар кеткенден кийин эле идиш жууп жатканда телефон чалуу болгон. Директор чалганын айтып, сүйлөшкөн соң, эшикке чыгып кеткен. Бир аздан соң эле мектептеги эжейлер үйүнө келген. Күйөөсү аялын издеп сарайга барып, асынган жансыз денесин тапкан. Күйөөсүнүн айтымында, окуя мектеп директору менен сүйлөшкөндөн 5 мүнөттөн кийин эле болгон.

«Жумуш орун керек болуп, жубайымды прокуратурадагы тааныштарына чалдыртып, суракка чакыртып жатып, өлүмгө жеткиришти. Мыйзам чегинде сот жообуна тартылышын сурайм»,- деген маркумдун жолдошу.