16-марттан тарта кампадан бөлүнгөн кумшекер жана өсүмдүк майы оор жүк ташуучу унааларга жүктөлүп, жер-жерлерге жөнөтүлүп жатканы тууралуу Мамлекеттик материалдык резервдер фондусуна караштуу Борбордук кампасынын жетекчиси Бактыбек Тайкашкаев билдирди.
Маалыматка ылайык, Мамлекеттик материалдык резервдер фондусунун Борбордук кампасынан азык-түлүк коопсуздугунун алдын алуу максатында 1 миллион килограмм кумшекер жана 500 миң литр өсүмдүк майы бөлүндү.
“Өлкөнүн түндүк, түштүк региондоруна фонддун Борбордук кампасынан өсүмдүк майын жана кумшекерди таратуу иштери жүрүп жатат. Учурда Бишкек шаарына жана Жалал-Абад облусуна азыктар атайын жүк ташуучу унаалары менен жөнөтүлдү. Бул продуктылар республиканын бардык аймактарына кезек-кезеги менен жөнөтүлөт”, — деди Бактыбек Тайкашкаев.
Анын айтымында, ӨКМ тарабынан республиканын аймактарына жөнөтүлгөн кумшекер жана өсүмдүк майын жер-жерлердеги жергиликтүү администрация жетекчилери соода түйүндөрүн аныктап, тийиштүү иш-чараларды жүргүзөт.
Белгилей кетсек, мамлекеттик материалдык резервдер фондусунун Борбордук кампасында азыктардын кору жетиштүү көлөмдө.
