«Бийик тоолуу аймактардын жашоочуларына көмөк» аттуу «Мамлекеттик жөлөкпулдар жөнүндө» мыйзамды ишке ашыруу боюнча токтомго министрлер кабинетинин башчысы Адылбек Касымалиев кол койду.
Маалыматка ылайык, документ үч жашка чейинки балдары бар, бийик тоолуу жана алыскы, барууга кыйын аймактарда, ошондой эле өзгөчө статусу бар айрым чек ара аймактарында жайгашкан калктуу конуштарда жашаган жарандарга (үй-бүлөлөргө) кошумча мамлекеттик колдоо көрсөтүү максатында иштелип чыккан.
«Бийик тоолуу аймактардын жашоочуларына көмөк» мыйзамынын алкагында, үчүнчү жана ар бир кийинки төрөлгөн балдар үч жашка толгонго чейин ай сайын берилүүчү жөлөкпулдун өлчөмү 3 миң сом өлчөмүндө белгиленет.
Каржы министрлигине жөлөкпулду өз убагында төлөө үчүн белгиленген тартипте республикалык бюджеттен каражат бөлүү тапшырылды.
Токтом 2026-жылдын 1-январынан тартып күчүнө кирет.
