Кыргызстанда кызылчадан 2 бала каза болду. Бул тууралуу Саламаттыкты сактоо министрлигинен билдиришти.
Маалыматка ылайык, Бишкек шаарында (3 жаштагы бала) жана Чүй облусунда (1 жаштагы бала) каза тапкан.
«Эки учурда тең балдар профилактикалык эмдөө календары боюнча эмдөөлөрдү алышкан эмес, ата-энелери диний көз караштан улам баш тартышкан», — деп берилет маалыматта.
Министрлик ата-энелери вирустук гепатит жана кургак учукка каршы профилактикалык эмдөөдөн баш тарткан жаңы төрөлгөн ымыркайлардын арасында оору катталып жатканын белгилейт.
Өлкөдө жыл башынан бери 1704 бала кызылчага чалдыкканы аныкталган. Көбүнчө Бишкек, Ош аймактарында.
Медиктер оорунун алдын алуу үчүн сөзсүз түрдө балдарды эмдөөдөн өткөрүү керектигин эскертти.
