Кыргызстандык Дмитрий Бивол WBAнын версиясы боюнча жылдын мыкты мушкери деп табылды. Спортчуга сыйлыкты Бүткүл дүйнөлүк бокс ассоциациясынын (WBA) президенти Гилберто Мендоза уюмдун юбилейлик конгрессинде тапшырды.
Бивол социалдык баракчасына «Мен WBA версиясы боюнча биринчи жолу «Жылдын мушкери» наамын алганым мен үчүн сыймык. Менин командама чоң рахмат! 2023-жылы жана андан кийин да колумдан келгендин баарын кылууга аракет кылам,» — деп жазган.
Жалпысынан Бивол рингдеги профессионалдык карьерасында 21 беттеште 21 жеңишке жетишкен.
Белгилей кетсек, Дмитрий Бивол Токмок шаарында туулуп өскөн. Ал эми, 15 жашында ата-энеси менен Орусияга көчүп кеткен.
