Кыргызстандык спортчу Калмира Билимбек кызы Амман шаарындагы (Иордания) мелдеште коло медаль жеңди.
Балбан кыз 59 килограммга чейинки салмак категориясы боюнча күч сынады.
Калмира Билимбек кызы килем үстүнө 16-августта чыгып, таймашты квалификациялык айлампадан баштаган. Биринчи кармашында ал өзбекстандык спортчуну 11:1 эсебинде жеңди. Андан кийин 1/8 финалда казакстандык балбан кызды 8:1 эсебинде утуп келе жатып, далысын килемге басып, таза жеңишке жетти. Чейрек финалда ал япониялык атаандашын 10:0 эсебинде утту. Бирок жарым финалдык беттеште Калмира Билимбек кызы бейтарап туунун алдында чыгып жаткан Алеся Гетмановага 4:6 эсебинде жеңилип, коло байге үчүн күрөшө турган болуп калган. Коло үчүн беттеште Калмира Билимбек кызынын атаандашы түркиялык Севим Акбаш беттешип, жеңиш кыргызстандык кыз тарапта болду.
