Саламаттык сактоо министрлиги баштапкы медициналык-санитардык жардам көрсөтүүчү саламаттык сактоо уюмдарына калкты тиркөө жол-жобосун бюрократиядан арылтуу боюнча биринчи этапты өткөрдү.
Ведомстводон билдиришкендей, калкты тиркөөнүн жаңы тартиби аймактык принципти жокко чыгарды, бул теңдик жана дени сак атаандаштыктын негизинде каалаган уюмга катталууга мүмкүндүк берет. Эми ар бир адам кварталына бир жолу катталган жерин алмаштырууга укуктуу.
Катталуу үчүн жеке идентификациялык номерин камтыган бир документтен тышкары, кошумча документтер талап кылынбайт. Мамлекеттик үлгүдөгү документтери жок адамдар үчүн өзгөчө учур, алар башка документтерди көрсөтүшү керек.
«Катталган калк» санариптик регистрин модернизациялоо жана саламаттык сактоо уюмдарын каржылоону камсыз кылуу жана маалымат алмашуу үчүн мамлекеттик органдардын маалымат базалары менен интеграциялоо жүргүзүлүүдө. Санариптик регистрди модернизациялоонун натыйжасында, каттоо онлайн режиминде жүргүзүлүшү мүмкүн, бул үчүн электрондук-санариптик кол тамга талап кылынат. Модернизациялоо саламаттык сактоо уюмдарынын ортосунда маалымат алмашуунун сапатын жана өз убагында болушун жакшыртууга мүмкүндүк берет, бул медициналык жардам көрсөтүүнүн сапатын жакшыртууга жана аны натыйжалуулугун жогорулатууга мүмкүндүк берет.
Каттоо процедурасын жөнөкөйлөтүү медициналык жардам алуудагы тоскоолдуктарды азайтат. Бул өзгөртүүлөр калкты саламаттыкты сактоо уюмдарына каттоо жол-жобосун жөнөкөйлөтүүгө, жарандар үчүн жеткиликтүү жана ыңгайлуу кылууга жардам берет.
