Микрокредиттөө компаниялары, ломбард пункттары берген каржылык колдоолордун үстөгү бир топ эле жогору. Сүткорлуктан арылууда мындай пайыздык пайдаларды көзөмөлгө салбаса, элге эле оор болууда. Бул тууралуу бүгүн, 16-мартта Жогорку Кеңешке №16 — Ноокен шайлоо округунан депутат Бактыбек Сыдыков  «Парламент» радиосунда билдирди.

«Кайсы гана финансылык мекеме пайызга каражат берип жаткан соң, бул көрүнүш Улуттук банк тарабынан көзөмөлгө алынышы керек. Улуттук банктын жылдык пайыз менен алганда насыяларга белгилеген үстөгү 20%дан ашпайт. Ал эми микрокредиттөө компаниялары, ломбард пункттары берген каржылык колдоолордун үстөгү бир топ эле жогору. Сүткорлуктан арылууда мындай пайыздык пайдаларды көзөмөлгө салбаса, элге эле оор болууда», — дейт депутат.

«Ломбарддарды жабуу туура эмес. Болгону анын ишине болгон көзөмөлдүк гана керек, — деген парламентарий, күрөөгө коюлган мүлк боюнча талаш — тартыштар бир тараптуу чечилбей, соттордун кийлигишүүсү менен таразаланышы керек», — деп кошумчалады.

Андан тышкары, ломбард ачуу үчүн талап кылынган уставдык капиталдын суммасы 500 миң сом гана болсо, ал эми банк ачууга зарыл болгон каражат эсеби 600 млн. сомдон кем болбошу керектигин белгиледи.