Лотереяны мыйзамсыз өткөрүү фактысы аныкталды. Бул тууралуу УКМКнын басма сөз кызматы билдирди.

Маалыматка ылайык, лотерияны уюштурган Кыргызстандын жараны Х.у.Н. болгон. «Баткен Күчү» лотереясын мыйзамсыз өткөрүү фактысы боюнча Кылмыш-жаза кодексинин 218-беренесинин 2-бөлүгүндө (Мыйзамсыз ишкердик кылуу) каралган кылмыштын негизинде иш козголгон.

Шектүү адамдардын иштеген жана жашаган жеринде тинтүү жүргүзүлүп, натыйжада 800 миң сом өлчөмүндөгү акча каражаттары, банктык карталар, транспорт каражаттарын пайдаланууга ишеним каттар табылып алынган. Ошондой эле байге катары ойнотулат делген 7 автоунаа унаа токтоочу жайга коюлду.

Белгилей кетсек, ар бир турда орточо байге фонду 5 миллион сомдон 8 миллион сомго чейин болсо, ал эми ойнотулган билеттердин саны 2800 даананы түзгөн. Ошол эле учурда лотереянын уюштуруучулары автоунааларды жана башка байгелерди ойнотууда катышуучуларды алдашкан.

Тактап айтканда, лотереянын жеңүүчүлөрү катары өздөрүнө тиешеси бар адамдарды колдонуп, байгелерди уюштуруучулар өздөрүнө ыйгарып алышкан.

Учурда башка мыйзамсыз лотереялык ишмердүүлүктү уюштуруучуларга карата тиешелүү ыкчам-тергөө иш-чаралары жүргүзүлүүдө.