Медицина тармагындагы реформага ылайык кызматкерлер толтурчу иш кагаздарын азайтуу аракеттери башталды. Бул тууралуу Саламаттык сактоо министринин орун басары Бакыт Жангазиев билдирди.
Маалыматка ылайык, үй-бүлөлүк дарыгерлер тобундагы бейтаптарды каттоо жана отчёттуулук иштерин онлайн форматка өткөрүү аракеттери жүрүүдө. Мында каттоо эрежелери да жөнөкөйлөштүрүлөт. Аталган маселе саламаттыкты сактоо жана санариптештирүү боюнча жумушчу топтун кеңешмесинде каралды.
Жыйында дарыгерлердин убактысы бухгалтердик кагаздарды толтурууга эмес бейтаптарды дарылоого коротулушу керектиги белгиленди.
«Бүгүнкү күндө медициналык мекемелердин дарыгерлери жана медайымдары бейтаптарга берилген 26 түрдөгү журналды, 45 түрдөгү отчеттуулук бланктарды жана 100гө жакын түрдөгү каттоо бланктарын толтурууга аргасыз. Мында кайталанган же актуалдуугу аз кагаздар кыскартылышы керек», — деп белгиледи Министрдин орун басары Жангазиев.
