Мээрим Жуманазарова «Гран-при Москва — АЛРОСА кубогу» мелдешинде орусиялык атаандашын жеңип алды. Бул тууралуу Күрөш федерациясынан билдиришти.
Маалыматка ылайык, мелдеш Москва шаарындагы «ВТБ Арена Парк» спорттук жайында өтүп, мелдешке балбан кыздын машыктыруучусу атасы Рахмадил Жуманазаров коштоп барган. Жуманазарова мелдеште атаандашы Ханум Велиеваны 3:2 эсеби менен жеңип алды.
Спортчу кыздар муну менен төртүнчү ирет кез келип жатат.
Эске салсак, Ослодо өткөн дүйнө чемпионатынын жарым финалында Жуманазарова Велиеваны уткан. Таймаш 3:3 эсебинде аяктаган, бирок акыркы аракетти жасап, упай алганы үчүн кыргызстандык балбан кызга артыкчылык берилген.
