Кечээ, 27-ноябрда Бишкек шаарында мэр Айбек Джунушалиевдин катышуусунда кезектеги көчөт отургузуу иш-чарасы болуп өттү. Бул тууралуу мэриянын басма сөз кызматы билдирди.
Экокеңештин чечимине ылайык, иш-чара борбордун экологиялык абалын жакшыртуу жана жашыл фондун көбөйтүү максатында уюштурулган.
«Бул ирет көчөт отургузуу иши Свердлов районуна караштуу аймакта жүргүзүлүп, катальпа жана акация дарактары отургузулду. Жашылдандыруу иштери — Бишкек шаарынын экологиялык муктаждыктарын эске алуу менен пландалган стратегиялык багыттардын бири. Көчөт отургузуу иштери этап-этабы менен улантылып, отургузулган көчөттөрдүн тамыр алышы боюнча туруктуу көзөмөл жүргүзүлөт. Көчөттөрдүн сапаттуу өсүшүн камсыздоо үчүн адистер тарабынан алдын ала топурактын абалы текшерилип, тиешелүү сугаруу жана агротехникалык иштер аткарылды», — деп жазылат маалыматта.
