Каракол шаардык милициясынын кызматкерлери кош бойлуу келинди ур-токмокко алып сабаган деп шектелүүдө. Бул тууралуу Акыйкатчы институтунун басма сөз кызматынан билдиришти.
Маалыматка ылайык, Акыйкатчы институтунун Ысык-Көл облусундагы ыйгарым укуктуу өкүлчүлүгүнө Г.А. аттуу жаран арыз менен кайрылган. Анда ал Каракол ШИИБинин үч кызматкери тарабынан сабалганын айткан.
Арыз ээсинин айтымында, 5-август күнү Каракол ШИИБинин 3 кызматкери ага кол салып, сабап киришкен. Андан соң талаага алып барып, муунтуп, өлтүрөбүз деп коркутушкан. Бул окуядан кийин жабырлануучунун 5 айлык боюнан түшүп калган. Ошондой эле ал акыйкатчынын аппаратына кайрылып, милиция кызматкерлерин жоопкерчиликке тартууга жардам берүүсүн суранган.
Ысык-Көл облустук прокуратурасы аталган кылмышка шектелгендерге карата Кылмыш-жаза кодексинин 321-беренесине ылайык (кызмат абалынан кыянаттык менен пайдалануу) сотко чейинки өндүрүш иштери башталганын билдирген.
Учурда тергөө иштери уланып жаткандыгы маалымдалды.
