Министрлер кабинети мамлекеттик жана муниципалдык органдардын кызматтык жана нөөмөттүк унааларды колдонуу эрежелерин тактады. Эми жумуш сапарлары жана кызматтык милдеттери үчүн колдонулган жеңил унаалардын кыймылдаткычынын көлөмү 2700 сантиметр кубдан ашпашы керек. Токтомдо тизмеси көрсөтүлгөн айрым кызмат адамдары үчүн гана өзгөчөлүк каралган.
Ошондой эле, мамлекетке өз ыктыяры менен берилген жана конфискацияланган же соттун чечими боюнча мамлекеттик менчикке айландырылган транспорт каражаттарын пайдаланууга да жол берилет.
Министрлер кабинети өзгөртүүлөр мамлекеттик органдардын карамагындагы унааларды эффективдүү жана үнөмдүү пайдаланууга багытталганын түшүндүрдү.
Токтом он күндөн кийин күчүнө кирет.
