Г.Айтиев атындагы Кыргыз улуттук көркөм сүрөт музейине уурулукка кирген чет элдик жаран кармалды. Бул тууралуу ИИМдин басма сөз кызматы билдирди.
Маалыматка ылайык, ИИМдин Күзөт кызматынын Биринчи май райондук күзөт бөлүмүнүн кайтаруусунда турган Г.Айтиев атындагы Кыргыз улуттук көркөм сүрөт музейине европа түспөлүндөгү 35-40 жаштагы жаран мыйзамсыз кирүүгө аракет кылган. Окуя 28-мартка караган түнү саат 02:14 чамасында болгон.
Музейдин бир бөлмөсүндө коңгуроо (сигнализация) жаңырып, күзөтчү имаратка бирөө киргенин көрүп, артынан чуркап, коңгуроо жаңырган бөлмөгө терезеден кирип барган. Бөлмөнүн эшиги бек болгонуна байланыштуу шектүү кача албай, каршылык көрсөткөндүгүнө байланыштуу колун толгоп, кармаган.
