Нарын–Оруктам автоунаа жолунун 50–75 чакырым аралыгындагы Капчыгай тилкеси 2025-жылдын 7-ноябрынан 2026-жылдын 15-апрелине чейин убактылуу жабылды.
Транспорт министрлигинин басма сөз кызматынан билдиришкендей, мындай чечим Нарын райондук мамлекеттик администрациясынын буйругунун негизинде кабыл алынып, катуу аба ырайына кар көчкүнүн түшүү коркунучунун жогорулашына байланыштуу жол кыймылынын коопсуздугун камсыздоо максатында кабыл алынган.
Азыркы учурда Транспорт министрлигинин №8 жол тейлөө ишканасы атайын жол белгилерин орнотуп жатат. Бул белгилер жол кыймылы кайра ачылганга чейин күчүндө болот.
Белгилүү болгондой, Нарын–Оруктам автоунаа жолунун бул тилкеси ар жылы коопсуздук максатында жазга чейин жабылат.
Ушул мезгил аралыгында жашоочулар альтернативдик Сары-Булак – Арчалы – Оруктам маршруту аркылуу каттай алышат.
