Бүгүн, 16-мартта Жалал-Абад облусунун Ноокен районунун Масы айыл аймагындагы Кызыл-Туу айылында 2019-жылы башталып, 2020-жылы пандемиядан улам токтоп турган 83 үйдүн курулуш иштери улантыла баштады.
Аталган жайда буга чейин 11 үйдүн пайдубалы курулган. Ал «Ас-Салам» кайрымдуулук фондунун каржылануусунда ишке ашууда. Социалдык шаарчанын алгачкы курулуш иштерине бүгүн президенттин Жалал-Абад облусундагы ыйгарым укуктуу өкүлү Абсаттар Сыргабаев, жергиликтүү бийлик жетекчилери жана айыл тургандары катышты.
Облус башчысы шаарчада аз камсыз болгон 100дөн ашуун үй-бүлө турак жай менен камсыздалаарын билдирди. Бул жергиликтүү муктаж тургундардын түйшүгүн жеңилдетээрин кошумчалады.
Белгилей кетсек, айылдагы 83 турак үй менен кошо бала бакча, мектеп, мечит жана тигүү цехи да курулат. Ага жергиликтүү бийлик 9 гектардан ашуун жер бөлүп берген.
