Кочкор районундагы Орто-Токой суу сактагычына 900 миң чабак коё берилди. Бул тууралуу райондук администрациянын басма сөз кызматы билдирди.
Маалыматка ылайык, сига балыгынын чабактары «Орто-Токой ынтымагы» ЖЧКсы тарабынан коё берилген. ЖЧКнын максаты балыктарды көбөйтүү жана балык чарбасын өнүктүрүү болуп саналат. Аталган иш-чарага Кочкор районунун акими Курбанбек Камчыев, Айыл чарба министрлигинин Балык чарба департаментинин өкүлдөрү, Ак-Өлөң айыл өкмөтүнүн башчысы Майрам Кыдыралиев жана башкалар катышкан.
Администрациядан билдиргендей, «Орто-Токой ынтымагы» суу сактагычты 2019-жылы тендерден утуп алып, ижарага алган. Ишкана өткөн жылы Айыл чарба министрлигине караштуу Балык департаменти менен балык өндүрүү, балык уулоо жана балык өстүрүү үчүн келишим түзгөн. Мындан улам суу сактагычтын аймагында каалаган учурда балык кармоого тыюу салынат. Ижарага алган гана компаниянын билети менен бир аз кармоого болот. Орто-Токой суу сактагычы 1956-жылы салынган, Кыргызстанда курулган эң биринчи суу сактагыч.
