Адвокат Айсулуу Жапар кызынын баласы даун синдромуна кабылган. Ал баласына тиешелүү жардамды мэриядан ала албай, аргасыздан шаардык кеңештин депутаттарына кайрылууга аргасыз болгон.
Ал депутаттарга Ош шаарынын социалдык маселелер боюнча вице-мэри Венера Рыскулова анын ишин 2 айга кечиктиргендиги үчүн кызматтык жоопкерчилигин кароону сунуштады.
“Бизди айнектен кууп чыкса, фортучкадан кирип жүрүп сурандык. Мен айфон алып бергиле деп жаткан жокмун, даун синдромуна кабылган баламды дарылатууга каражаттык колдоо сурап жатам. Операцияны Санкт-Петербургдан 20 миң долларга жасатууга мүмкүнчүлүк алдык, негизи мындай операция Европада 40 миң еврого жасалат”.
Андан сырткары Айсулуу Жапар кызы Ош шаарынын мэринен жардам сурап келгенде тармакты тейлеген вице-мэр тоскоолдук кылганын айтып, ага чара көрүлүүсүн суранды. Бул боюнча прокуратурага майнап чыкпаса президентке чейин барарын кошумчалады.
Ал эми вице-мэр Венера Рыскулова Жапар кызы анын кабылдамасына келбегендигин, мэр Алмаз Мамбетовдун кабылында болгондугун билдирди.
Ошондой эле, 5 миң сом жардам берилгендигин, андан сырткары эми Саламаттык сактоо министрлиги менен байланышып, Орусияда жасалчу операциясынын баасын арзандатса болорун ал жагынан колдоо көрсөтүүгө аракет кыларына ишендирди.
