Ош шаарынын Раимбеков көчөсүндөгү батирлердин биринен 29 жаштагы жигиттин жансыз денеси табылды. Маалыматты ӨКМдин маалымат кызматы тастыктайт.
ӨКМге 10-июль Раимбеков көчөсүндөгү көп кабаттуу турак үйдүн биринин эшиги ачылбай жатканын кабарлашкан. Куткаруучулар №2 үйдүн 39-батирдин эшигин бузуп киргенде, ичинде 1992-жылы туулган Ж.К. аттуу эркек кишинин жансыз денеси табылган.
Окуя боюнча Ош ШИИБине 10-июль түнкү саат 23:00дө кабар келип түшкөн. Тергөөчүлөр барган кезде, куткаруучулар үйдүн ичинде болгон.
Алгачкы кароодо киши колдуу болбогондугу маалым болгон. Денеде көгөрүү же башка өзгөчө жагдайлар байкалган эмес. Жакындары маркумдун талма оорусу бар экендигин айтып, экспертизага берүүдөн баш тарткан.
