Бүгүн, 7-июль Ош шаарында добуш сатып алууга аракет кылгандар 115 миң сом жана шайлоочулардын тизмеси менен колго түшүрүлдү. Бул тууралуу Ош ШИИБинин маалымат кызматы оперативдүу маалымат берди.
«7-июль күнү, саат 11.37 чамасында Ош ШИИБинин Ак-Буура милиция бөлүмүнүн кызматкерлери тарабынан «шайлоочулардын добуштарын сатып алуу» болуп жаткандыгы маалымат келип түшүп, ал маалыматты текшерүү учурунда Ош шаарынын Жумабаев көчөсүндөгү үйлөрдүн биринен аталган шек менен Ош шаарынын тургундары 1980-жылы туулган И.Х., 1959 –жылы туулган Р.Ш. жана 1959-жылы туулган Л.Б. кармалышты. И.Х.нын жанынан 115 миӊ сом акча жана ошол аймакта жашаган шайлоочулардын тизмеси табылды«-, деп жазылат маалыматта.
Кармалгандар кайсы партиянын өкүлү экендиги,тергөөнүн кызыкчылыгы үчүн азырынча айтыла элек.
Учурда бул факт боюнча Ош ШИИБи жазык кодексинин 192-беренесинин белгилерине ылайык сотко чейинки өндүрүш ишин башталды.
