Ош шаарынын Курманжан датка муниципалдык аймактык башкармалыгында жайгашкан мурдагы “Турбаза” мэриянын балансына кайтаруу иштери жүрөт. Бул тууралуу Ош шаарынын мэри Жеңишбек Токторбаев таңкы рейддик кыдыруу учурунда тиешелүү жетекчилерге конкреттүү тапшырмаларды берди.
Шаар башчысы имараттын учурдагы абалы канааттандырарлык эмес экенин белгилеп, объектти шаардык баланска өткөрүү жана аны толук капиталдык оңдоп-түзөөдөн өткөрүү зарылдыгын айтты.
Аталган “Турбаза” учурда Профсоюз комитетинин карамагында турат. Дээрлик 40 жыл аралыгында бир да жолу капиталдык оңдоп-түзөөдөн өтпөгөндүктөн, имараттын эскилиги жетип, кароосуз калган абалда.
Алдыда бул жай шаардык баланска өткөрүлүп, жаңыланган соң муниципалдык санаторий катары калкка кызмат көрсөтүү пландалууда. Бул шаар тургундары үчүн социалдык багыттагы дагы бир маанилүү объект болуп калмакчы.
