Кыргызстандын Чехиядагы ардактуу консулунун алдын ала маалыматы боюнча, Праганын Ян Палах аянтындагы университетте болгон ок атуудан каза болгондордун арасында Кыргызстандын жарандары жок. Бул тууралуу ТИМден билдиришти.
Маалым болгондой, Прагадагы Карлов университетинин философия факультетинин 24 жаштагы студенти Дэвид К. аудиториядагы студенттерге, ошол маалда окуу жайдын астынан өтүп бара жаткан адамдарга мылтыктан ок чыгарган.
Акыркы маалыматтарга караганда, атышуудан 14 адам каза болуп, 25 адам жарадар болгон.
Полициянын маалыматына ылайык, Дэвид К. буга кылдаттык менен даярданган. Окуядан соң ал өзүн-өзү өлтүргөн.
