Президент Садыр Жапаров Баткенде кыргыз-тажик чек арасындагы атышууда курман болгон кыргызстандык жоокер Хуснидин Хажиевдин үй-бүлөсүнө көңүл айтты. Бул тууралуу Министрлер кабинетинин Баткен облусундагы ыйгарым укуктуу өкүлү Абдикарим Алимбаев билдирди.
Президент маркумдун жакындарын колдоо максатында Баткен шаарынан 82 чарчы метр жаңыдан курулуп жаткан үйдү берүүнү облус башчыга тапшырган.
Маркумдун айылдаштарынын айтымында, чек ара кызматкеринин артында кош бойлуу жубайы жана уулу калды.
Эске сала кетсек, 8-июлда Лейлектин Көк-Жайлоосунда (Чашмагильдан ашуусу) тажик аскерлери кыргыз аскерлерине кол салып, Хуснидин Хажиев окко учкан. Анын сөөгү 10-июлда өзү туулуп-өскөн Лейлек районунун Бешкент айылында жерге берилди.
Кыргызстан менен Тажикстандын чек арасы – 970 чакырым. Мунун 519 чакырымы такталган, калганы тактала элек.
