“Ишенип берилген мүлктү ыйгарып алуу” боюнча айыпталып жаткан «С-Лайн» кооперативинин жетекчиси Бакыт Аалиев үй камагына чыкты. Бул тууралуу бүгүн, 23-мартта 7-каналга Ош облустук сотунан билдиришти.
Маалыматка караганда, бөгөт чарасы Ош шаардык сотунда кечээ, 22-мартта каралып, үй камагына чыккан. Ал 2 ай үй камагында болот. Буга кылмыштын категориясы анча оор эмес кылмыштарга киргени себеп болгон. «Жашаган жери туруктуу, тергөөдөн качууга себеп жок. Тараптар менен келишим болгон. Бул иш жарандык тартипте каралышы керек»,- дешти соттон.
Белгилей кетсек, анын үстүнөн 24 адам арыз жазган, андан сырткары Бишкек шаарында дагы жабырлануучулар бар экени айтылууда. Ал эми тергөөнүн алгачкы териштирүүсүндө эле 40 миллион сомдук зыян эсептелген.
