20-21-мартта Тышкы иштер министри Руслан Казакбаевдин чакыруусу боюнча эки тараптуу мамилелердин тарыхында алгачкы жолу Сауд Араб Падышалыгынын тышкы иштер министри Улуу Даражалуу Ханзаада Файсал бин Фархан Аль Сауд Кыргыз Республикасына расмий сапары менен келет. Бул тууралуу ТИМдин басма сөз кызматы билдирди.
Маалыматка ылайык, Кыргызстан менен Сауд Араб Падышалыгынын ортосунда дипломатиялык мамилелердин орнотулгандыгынын 30 жылдык маарекесинде боло турган расмий сапардын алкагында, КРнын президенти Садыр Жапаров, Министрлер Кабинетинин төрагасы Акылбек Жапаров жана тышкы иштер министри Казакбаев менен сүйлөшүүлөр жүргүзүлөт.
Сүйлөшүүлөрдүн жүрүшүндө, соода-экономикалык жана маданий-гуманитардык тармактарга басым жасоо менен бирге, кыргыз-сауд мамилелерин кеңейтүүнүн абалы жана келечеги, ошондой эле эл аралык жана регионалдык уюмдардын алкагында мындан аркы өз ара аракеттенүү маселелери кеңири каралат.
