Бүгүн Ош шаардык сотунда «С-Лайн» турак -жай кооперативинин жетекчиси Бакыт Алиевдин баш коргоо чарасы каралды. Ага 210-берене “Ишенип берилген мүлктү ыйгарып алуу” боюнча кылмыш иши козголгон.
Мындан улам, сот ага коюлган берене оор кылмыштарга кирерине жана ыйгарып алынган сумма көптүгүнө байланыштуу ушундай чечим кабыл алган. Эгерде Бакыт Алиев жогоруда айтылган берене менен соттолсо 10 жылга эркинен ажыратылып, мал-мүлкү конфискацияланышы да мүмкүн. Азырынча шаардык сот Алиевди тергөө мөөнөтү бүткөнгө чейин камакта калтырды.
Белгилей кетсек, анын үстүнөн 24 адам арыз жазган, андан сырткары Бишкек шаарында дагы жабырлануучулар бар экени айтылып жаткан. Ал эми тергөөнүн алгачкы териштирүүсүндө эле 40 млн сомдук зыян эсептелген.
