Сокулук районунда төлөм терминалдарын уурдоого шектүүлөр кармалганын Чүй облустук милициясы билдирди.
Билдирүүгө ылайык, февраль айында Сокулук РИИБине эки жаран арыз менен кайрылган. Анда азык-түлүк саткан дүкөнүнө белгисиз бирөөлөр киришип, акча каражаттарын жана төлөмдөрдү кабыл алуучу терминалдарды уурдап кетишкенин айткан. Биринчи факты боюнча 4 миң сом жана ичинде 44 миң сомдон ашык акча каражаты бар терминал, экинчи факты боюнча 29 миң сом акча жана жалпы баасы 1 миллион сомдук терминал уурдалган.
Бул факты боюнча Кылмыштардын бирдиктүү реестрине «уурдоо» беренеси менен катталып, териштирүү иштери башталган.
Аталган кылмышка шектүү катары 2001-жылы туулган С.Э. жана 1999-жылы туулган Т.Ч. аттуу жарандар кармалып, убактылуу кармоочу жайга камакка алынды.
Учурда сотко чейинки өндүрүш иштери улантылууда.
