Кечээ, Жогорку Кенештин транспорт, коммуникациялар, архитектура жана курулуш боюнча комитетинин көчмө жыйыны Сузак районунда өттү.
Маалыматка ылайык, Сузактагы Кара-Дарыя айыл өкмөтүнүн Бостон, Кундузчу, Алашан, Питомник, Аэропорт участкаларынан дарыя агып өтөт. Кара-Дарыя суусу аркылуу Кыргызстан Өзбекстан менен 16 чакырым аралыкта чектешет. Өзбекстандын Пахта-Абад учаскасына чейин 11 чакырым суунун жээги бекемделген эмес. Мунун кесепетинен Кара-Дарыя айыл аймагынын 600 гектар жер аянты, 200 турак-жай кооптуу абалга кептелген.
Сел ташкынынан 1000 гектарга жакын айыл чарба жери суу алдында калган жана 50 үй жараксыз абалга келген. Айыл өкмөттүн башчысы Нурбек Караев депутаттарга маалымат берип, тезинен дарыянын 4.5 чакырым жерине дамба куруп бекемдөө зарылдыгын айтты. Анын айтымында, сел жеген сайын, Кыргызстандын жери желип, чегара жылып жатканын кошумчалады.
Жогорку Кеңеш депутаты Тазабек Икрамов бул Сузактагы эң оор маселе болуп жатканын белгилеп, акча каражатын бөлүп берүүнү чечимге кийирүү зарылдыгын комитет мүчөлөрүнө айтты.
Белгилей кетсек, тармактык комитеттин төрагасы Б. Сыдыков, мүчөлөрү У. Ормонов, М. Саккараев, А. Маткеримов, М. Сыдыков, Б. Чойбеков, Б. Шабазов, Э. Сулайманов, А. Исраилов жана министрлер кабинетинин мүчөлөрү көчмө жыйындын жүрүшүндө бир катар айыл өкмөттөрдүн мектеп, жол сыяктуу маселелери менен жеринде таанышып жүрөт.
