Жалал-Абад облусунун Сузак районундагы Арал айылында таза суу долбоору ишке ашырылууда. Бул тууралуу өкмөттүн аталган облустагы өкүлчүлүгүнөн билдирди.
Маалыматка ылайык, долбоор “Бүткүл дүйнөлүк жаштар ассамблеясы” тарабынан каржыланып, 3 миң метр аралыкка суу жүргүзүү иштери жүрүп жатат.
«Буга чейин Арал айылында таза суу көйгөйү орчундуу болуп, тургундарга бир катар кыйынчылыктар жаралып келген»,- дейт Сузак айылдык кеңешинин депутаты Шерзатбек Умарбеков.
Маселени чечүү максатына азыркы учурда облустук жана жергиликтүү бийлик “Бүткүл дүйнөлүк жаштар ассамблеясы” менен биргеликте иш алып барууда.
Эскерте кетсек, Сузак районунун Арал айылында 4 миңдей калк жашайт.
