Талас облусунда мамлекеттик жана муниципалдык кызматкерлер жер тилкелерин мыйзамсыз берип, жеке менчикке өткөрүп жиберишкени аныкталды. Бул тууралуу УКМКдан билдиришти.
10-июнда Талас райондук шаар куруу жана архитектура башкармалыгынын жеке турак-жай куруу бөлүмүнүн башчысы, “Кадастр” мамлекеттик мекемесинин Талас райондук бөлүмүнүн жерге жайгаштыруучусу жана Талас районунун Нуржанов айыл аймагынын жер адиси кармалып, убактылуу кармоочу жайга киргизилди.
Алар материалдык пайда алуу максатында айыл чарба багытындагы жер тилкелерин мыйзамсыз берип, жеке менчикке өткөрүп жиберишкен. Адистердин айтымында, бул аймактагы 0,15 гектар жердин баасы 1 миллион 300 миң сомго бааланат.
Учурда тергөө тарабынан келтирилген зыянды аныктоо боюнча тиешелүү процессуалдык чаралар көрүлүүдө.
