6-сентябрда Тажикстандын Улуттук коопсуздук боюнча мамлекеттик комитети тарабынан кармалган кыргыз жараны Кубанычбек Акматов үй камагына чыгарылды. Бул тууралуу Баткен облусунун ички иштер башкармалыгынан билдиришти.
Маалыматка ылайык, ал азыркы учурда Душанбеде, аны Кыргызстанга кайтарып алуу боюнча сүйлөшүүлөр жүрүп жатат.
«Жакын арада Кубанычбек Акматовду бизге өткөрүп берет деп үмүттөнөбүз», — деп билдиришти ШИИБден.
Белгилей кетсек, 6-сентябрда Баткен районунун Үч-Дөбө айылынын тургуну Акматов дары чөптөрдү чогултуп кайтып келе жаткан учурда Тажикстандын Улуттук коопсуздук боюнча мамлекеттик комитетинин транзиттик зонасында кармалган. Тажиктер аны транзиттик зонада кармап, Душанбедеги убактылуу кармоочу жайга киргизишкен.
