Жалал-Абад облустук билим берүү усулдук борборунун директору Акылбек Токтосунов Сузак районундагы окуучулардын облустук олимпиададагы кемчиликтер боюнча айткан пикирин төгүнгө чыгарды.
Токтосунов окуучу кыздар быйылкы Сузак райондук олимпиадасына катышып, өтпөй калышкан, бирок облустук сынакка катышкан эмес дейт.
“7-каналдан чыккан алардын билдирүүлөрү боюнча тактоо иштерин жүргүзгөндө эки окуучу тең былтыркы облустук олимпиадага катышпагандыгы аныкталды. Алар бул нааразычылыгын райондук олимпиаданынын жыйынтыгы боюнча айтып, адашып билдирүүсү мүмкүн” — деди жетекчи.
Буга чейин президенттин Жалал-Абад облусундагы ыйгарым укуктуу өкүлү Абсаттар Сыргабаев “Окуучулар арасында өтүүчү предметтик олимпиада сынактарында коррупция бар”- деген пикирин билдирип, прокуратурага карап чыгууну табыштаган. Ал арада Сузак районундагы С.Акбаров атындагы мектептин эки окуучусу облустук олимпиадага катышып бирок өтпөй калганын, анын себебин акча бере албагандыгы менен байланыштырышкан.
