Орусия менен Украинанын ортосунда куралдуу жаңжал башталгандан бери Украинадан 3 миллиондон ашык адам чыгып кеткенин Франциянын AFP маалымат агенттиги 15-мартта БУУнун Качкындар иштери боюнча Жогорку башкармалыгына шилтеме берип жазып чыкты.

Маалыматка ылайык, согуш болуп жаткан аймактардан качкан 3 миллиондон ашуун адамдын 1,4 миллиону жаш балдар. Башкармалыктын айтымында, согуштан качкан украин жарандары негизинен Польшанын, Румыниянын, Молдованын, Венгриянын, Словакиянын жана Орусиянын аймагына өткөн.

Эске салсак, Орусия менен Украинанын ортосундагы жаңжал 24-февралдын таңында тутанган. Тагыраагы, Орусиянын лидери Владимир Путин Донбасста аскердик атайын операция өткөрүү чечимин кабыл алгандыгын жарыя кылган. Ал мындай кадамдын максаты «акыркы сегиз жылдан бери Киев режиминен запкы тартып келген элди коргоо» экенин айткан. Ал эми Украинанын президенти Владимир Зеленский бул аракетти өлкөгө ачылган согуш деп сыпаттаган. Андан бери жүздөгөн аскерлер жана жайкын тургундар каза тапты. Согушту токтотууну көздөгөн тынчтык сүйлөшүүлөрүнөн майнап чыга элек.