АКШ долларынын курсуна байланыштуу кырдаалдан улам мыйзам талаптарын бузганы үчүн Улуттук банк Бишкекте тогуз акча алмаштыруучу жайдын лицензиясын убактылуу токтотту.
Маалыматка ылайык, “Ариет финанс”, “Ордо Финанс Плюс”, “Нурислам Лтд” жана “Азамат финанс” 16-марттан 30-мартка чейин ишин токтотот. Ал эми “АЯТ НУР”, “Рашидик”, “Исхак жана Исаак”, “Интегро Ко” жана “Баймак Финанс” акча алмаштыруучу жайлары 16-марттан 25-мартка чейин убактылуу иштебей турат.
Орусия менен Украинанын ортосундагы кырдаалдан улам Европа өлкөлөрү жана АКШ Орусияга бир катар экономикалык санкцияларды салып рублдин куну түшүп, доллардын баасы өстү. Анын таасири Кыргызстанга да тийип, бир доллардын наркы 105 сомго дейре чыгып кетти.
Эскерте кетсек, Улуттук банк 11-мартта долларды Кыргызстандан сыртка алып чыгууга убактылуу тыюу салган.
