Ысык-Көлдө баңгизат ташып бара жаткан жаран кармалды. Бул тууралуу Ысык-Көл ОИИБнын басма сөз кызматы билдирди.
Маалыматка ылайык, Түп РИИБдин баңгизаттарды мыйзамсыз жүгүртүүгө каршы күрөшүү кызматынын ыкчам кызматкерлерине, жергиликтүү тургун баңгизаттарын Бишкек шаарына чыгарып кетүүнү көздөп жаткандыгы жөнүндө маалымат түшкөн.
Аталган маалымат райондук милициянын Кылмыштардын бирдиктүү реестрине катталып, Кылмыш-жаза кодексинин 282 (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) беренесинин негизинде кылмыш иши козголгон. Жүргүзүлгөн тергөө-ыкчам иштеринин натыйжасында, Балбай айылынын 32 жаштагы тургуну К.Б. аттуу жаран аныкталган.
Милиция кызматкерлери тарабынан аталган жаран такси менен Бишкек шаарына бара жаткан жеринен кармалып, өздүк кароо жүргүзүү учурунда, бир литрлик айнек банкасына салынган 72 даана тегерек формасында жана жапайы кендирдин жыты бар зат табылып алынган.
Алынган далил заты баңгизаттын кайсыл түрүнө кирерин аныктоо максатында соттук-химиялык экспертизасы дайындалды. Райондук соттун чечими менен, шектүү жаранга карата 2 айга камака алуу баш коргоо чарасы кабыл алынды.
Учурда тергөө амалдары уланууда.
