Каракол шаарында алдамчылыктын бети ачылды. Бул тууралуу Ысык-Көл ОИИБнын басма сөз кызматы билдирди.
Маалыматка ылайык, Караколдо «Унаа» мамлекеттик мекемесинин жанынан белгисиз жаран, айдоочулук күбөлүктөрдү алууга жардам берем деп, автомектептердин ар бир курсанттарынан 5000 сом акча каражаттарын алып, убадасын аткарбай изин жазгырып кеткен.
Аталган жаран милиция кызматкерлери тарабынан кармалып, шектүү күнөөсүн толугу менен мойнуна алып, «Алдамчылык» беренеси менен кылмыш иши козголду.
Шаардык милициянын тергөө кызматы тарабынан, кылмышка шектүү катары кармалган Каракол шаарынын 32 жаштагы тургуну С.Ж. алдамчылыктын беш учуруна катыштыгы бар экенин аныкташты.
Учурда, шектүүнүн башка ушундай кылмыштарга бар, же жоктугу текшерилүүдө.
