Жалал-Абад шаардык Өзгөчө кырдаалдар бөлүмүнө эки даана өрт өчүрүүчү унаа тапшырылды. Бул тууралуу Жалал-Абад шаарынын мэриясынын басма сөз кызматы билдирет.
Маалыматка ылайык, бүгүн, 29-мартта заманбап өрт өчүрүүчү автоунаалар менен президенттин Жалал-Абад облусундагы өкүлү Абсаттар Сыргабаев, шаар мэри Эрнисбек Ормоков, ӨКМнин орун басары Эделбек Маматкулов, ӨКМдин облустук башкармалыгынын жана шаардык бөлүмүнүн жетекчилери менен биргеликте таанышып чыкты.
Белгилей кетсек, Орусиядан чыгарылган Камаз АЦ-6-40 үлгүсүндөгү өрт өчүрүүчү унаалар акыркы үлгүдөгү өрт өчүрүүчү жабдыктар менен жабдылып, өзүндө 6 тонна суу алып жүрөт.
Аталган техникалардан Жалал-Абад облусуна жалпы 5 даана келген болсо, анын экөөсү Жалал-Абад шаардык өзгөчө кырдаалдар бөлүмүнө берилди.
Эске салсак, шаардагы өрт өчүрүүчү унаалар соңку жолу 2009-жылы жаңыртылган.
