Жалал-Абадда уюлдук телефон жана акча тоногондор кармалды. Бул тууралуу облустук милициянын басма сөз кызматы билдирди.
Маалыматка ылайык, ушул жылдын 19-январь күнү 102 номерине Жалал-Абад облустук ооруканасынын дарыгери чалып, 1978-жылы туулган А.А. аттуу жаран денесинен жараат алып, ооруканага келип түшкөндүгүн билдирген.
Текшерүүнүн жүрүшүндө, жабырлануучу 18-январь күнү саат 23:00 чамасында кафелердин биринде шериктери менен спирт ичимдигин ичишкен. Ал жерден чыккан соң чогуу отурган балдар аны уруп, 20 миң сом акчасын жана 8 миң сомдук уюлдук телефонун алып коюшкандыгын билдирип арыз менен кайрылган.
Бул факты Кылмыш-жаза кодексинини 206-беренеси («Тоноо») менен катталып, сотко чейинки өндүрүш иши ачылып, соттук-медициналык экспертиза дайындалган.
Жүргүзүлгөн иштердин натыйжасында, Сузак районунун тургундары 1981-жылы туулган А.С. жана 1988-жылы туулган А.Э. кармалып, 2 айга убактылуу кармоочу жайга киргизилген.
Учурда тергөө амалдары жүрүүдө.
