Бүгүн, Жалал-Абад облусунда көптөгөн тармактарда жигердүү эмгектенип келе жаткан 120га жакын аялга майрамдык маанай тартууланды.
Салтанатка президенттин Жалал-Абад облусундагы ыйгарым укуктуу өкүлү Абсаттар Сыргабаев катышып, жалпы айымдарды майрамы менен куттуктады.
«Урматтуу энелер, кымбаттуу эже-карындаштар! Бүгүнкү саамалыктын жалпы катышуучуларды!
Аялзаты эне, жашоо башаты, үйдүн куту. Бүгүнкү күндө да айымдарыбыз бала тарбиялап, үй-бүлө түйшүгүн тартып, келечек муундарга адеп-ахлактык баалуулуктарын жайылтып келет. Айымдар дээрлик бардык тармактарда эмгектенип, ийгиликтерди жаратууда. Заман талабына ылайык эркектер менен тең тайлаша турмуш жүгүн артууда.
Мамлекеттин тынчтыгы, өсүп-өнүгүүсүндө илим-билимдүү жаратман айымдардын салымы чоң. Сиздер тарбяилаган татыктуу уул-кыздарыңыздар мекенди коргоп, мамлекеттин өнүгүүсүндө талыкпай эмгектенип келе жатышат. Бул аялзатынын коомго кошкон эң зор салымы»,–деди Абсаттар Сыргабаев.
Ошондой эле алдыңкы кызматкерлерге ыйгарым укуктуу өкүлдүн Ардак грамоталары тапшырылды.
