Бишкек гарнизонунун Аскер прокуратурасы Дженго лакап аты менен уюшулган кылмыштуу топтун мүчөсү Кадырбек Досоновдун сабалышы боюнча сотко чейинки өндүрүштү баштады. Бул тууралуу жергиликтүү маалымат булактары жазып чыгышты.
Маалыматка ылайык, денеге залал келтирүү фактысы Кылмыштардын жана жоруктардын бирдиктүү реестрине Кыргыз Республикасынын Кылмыш-жаза кодексинин «Кызматтык ыйгарым укугунан аша чабуу» беренеси боюнча катталгандыгы көрсөтүлгөн.
Эске салсак, Кадырбек Досонов УКМКнын Оштогу кеңсесине барып, андан кийин кармалган. Бишкек шаарынын Биринчи Май райондук сотунун чечими менен ал убактылуу кармоочу жайга киргизилген. Жактоочусу Назгүл Сүйүнбаева билдиргендей, кардары «Манас» аэропортунан УКМКнын имаратына жеткирилип бара жатканда катуу сабалган. Кадырбек Досоновго жер тилкесин мыйзамсыз басып алуу, ошондой эле кылмыш жолу менен алынган кирешелерди легалдаштыруу боюнча айып тагылууда.
