Нариман айыл өкмөтүнүн юристи, Нариман жергиликтүү кеңешинин депутаты жана суу пайдалануучулар ассоциациясынын жетекчиси кармалды. Бул тууралуу УКМКнын басма сөз кызматы билдирди.
Маалыматка ылайык, УКМК тарабынан Ош облусунун Кара-Суу районунун Нариман айыл аймагынын Нариман айыл өкмөтүнүн жер тилкелерин мыйзамсыз сатуу фактысы боюнча сотко чейинки өндүрүштүн алкагында жүргүзүлгөн ыкчам-издөө иштеринин жыйынтыгында Нариман айыл өкмөтүнүн юристи А.А., Нариман жергиликтүү кеңешинин депутаты П.З. жана Суу пайдалануучулар ассоциациясынын жетекчиси Н.Р. аттуу жаран кармалды.
Кармалган жарандар мыйзамсыз документтештирүү жолу менен айыл чарба багытындагы жерлерди мыйзамсыз сатууну уюштурушканы аныкталган.
Учурда кармалгандар УКМК тергөө камак жайына киргизилип, тергөө иштери улантылууда.
