Эмгек, социалдык камсыздоо жана миграция министри Канат Сагынбаев Чүй облусунда балдарын жалгыз тарбиялап жаткан аталардан кабар алды. Бул тууралуу ведомстводон билдиришти.
Маалыматка ылайык, алардын бири — жети баланы тарбиялап келе жаткан Чыңгыз Кытаев. Ал кыйынчылыктарга карабастан, балдарын мээрим жана камкордук менен курчап, аларга татыктуу тарбия жана билим берүүгө аракет кылууда.
Экинчи үй-бүлөдө Хасанбай Калмурзаев төрт баланы тарбиялап келет, алардын бири майыптыгы бар бала. Ал күн сайын көптөгөн сыноолорду жеңип, чоң жоопкерчилик жана бекем эрк менен балдарына кам көрүп, алар үчүн жылуу, сүйүүгө жана колдоого толгон үй-бүлөлүк чөйрөнү түзүп келет.
Жолугушуу учурунда Канат Сагынбаев аталардын кайраттуулугун жана жоопкерчилигин белгилеп, үй-бүлөлөргө мектеп парталарын, кир жуугуч машиналарды жана азык-түлүк баштыктарын тапшырды.
«Ата – бул таяныч жана жоопкерчиликтин үлгүсү. Балдарды жалгыз тарбиялоо чоң сабырдуулукту талап кылат. Мамлекет мындан ары да үй-бүлөнү бекемдөө саясатын активдүү жүргүзөт, анткени бакубат үй-бүлө – күчтүү коомдун негизи», – деди министр.
