Кечээ, 18-сентябрда, Өзгөн шаарында Кыргыз Республикасынын 30 жылдыгына арналган «Өзгөн-Мунара-2021» этно-фольклордук фестиваль болуп өттү. Иш-чарага Президент Садыр Жапаров, Жогорку Кеңештин депутаттыры, тарыхчылар, изилдөөчүлөр, маданият ишмерлери жана чет элдик меймандар катышты.
Профессор Мустафа Джеват Акшит Садыр Жапаровго имам Сарахсинин адамзатынын баалуулуктары жана дүйнөтаанымы тууралуу түрк тилине которулган «Аль-Мабсут» 31 томдук эмгегин тапшырды.
Фестивалда кол өнөрчүлөрдүн буюмдарынын этно-жарманкеси, Өзгөн жергесинин дыйканчылыктагы жетишкендиктери көргөзмөсү уюштурулган. Андан соң көрүүчүлөгө «Өзгөн менин жүрөгүмдө» театралдык прологу тартууланды.
Мамлекет башчысы ата-бабалардын тарыхый жана маданий мурастарын, алардын бири болгон «Өзгөн» комплексин сактоонун маанилүүлүгүн белгиледи. Ошондой эле, «Өзгөн-Мунара-2021» иш-чарасынын уюштуруучуларына алардын элдин руханий, маданий жана адеп-ахлактык өнүгүүсүнө кошкон салымы үчүн чоң ыраазычылык билдирди.