Бүгүн, 6-апрелде Жалал-Абадда 7-апрель–Элдик революциясынын курмандыктары эскерилди. Бул тууралуу шаардык мэриядан билдиришти.

Жалал-Абад шаарынын борбордук аянтында өткөн иш-чарага президенттин Жалал-Абад облусунун өкүлү Абсаттар Сыргабаев, шаар мэри Эрнисбек Ормоков, мекеме-ишканалардын, билим берүү мекемелеринин кызматкерлери жана жергиликтүү тургундар катышты.

Облус башчысы 2010-жылдын 7-апрелинде Кыргызстан калкы өзүн тарыхый процесстин жигердүү катышуучусу жана бийликтин чыныгы ээси экендигин бүт дүйнөгө даңазалаганын белгиледи.

«Эгемендүү Кыргызстандын тарыхында Апрель окуялары орду толгус жоготуулардын, кырчындай өмүрлөрдүн кыйылышы менен коштолгон окуялар катарында калды. Арадан канча мезгил ɵтсɵ да, шейит кеткен Апрель баатырларынын кайгысы эч качан унутулбайт. Соңку жылдары мамлекетибизде орун алып жаткан өсүп-өнүгүүлөр, экономикалык көрсөткүчтөрдүн жогорулашы өлкөдөгү стабилдүүлүк натыйжасында жаралып жатат»–деди Абсаттар Сыргабаев.

Эскерүү иш-чарасында 7-апрель–Элдик революциясынын курмандыктарынын элесине гүл коюлуп, куран окулду.