Саламаттык сактоо министри Алымкадыр Бейшеналиев депутаттарын коронавируска каршы вакцина алууга чакырды.
Министр Жогорку Кеңештин бүгүнкү жыйынынын жүрүшүндө депутаттын суроосуна жооп берип жатып, дүйнө жүзүндө, анын ичинде Кыргызстанда коронавирус күчөй баштагандыгын айтты.
«Бизде коронавируска каршы вакцина бар. Мен биринчилерден болуп кайрадан эмдөөдөн өттүм. Эл өкүлдөрүн да вакцина алууга чакырып кетем. Сасык тумоо, коронавирус жана башка ушул сыяктуу вирустук жугуштуу оорулардын алдын алуу үчүн сөзсүз эмдөөдөн өтүү керек», — деди министр.
Бейшеналиев өз сөзүндө учурда өлкө боюнча дарыгерлердин баары эмдөөдөн өтүп жатышкандыгын кошумчалады.
«Бирок ата-энелердин өздөрүнүн эмдөөдөн өтпөй жаткандыгы учурда чоң көйгөй болууда. Эл арасында түшүндүрүү иштерин жүргүзүү багытында муфтият менен да тыгыз иш алып баруудабыз», — деди саламаттык сактоо министри.
